Eph 6 | ENQ | STEP | Nyakama wane dupame Kamongo doko lao masetala nyakamanya endangi takangepa dolaponya pii auu pyoo sakamaiyepape. Dopa pingi mana doko tolatae.

a6:1Pot 6:20; Kl 3:20-21

b6:2Eke 20:12; Mt 15:4

c6:3Dit 5:16

d6:4Dit 6:7,20-25; Wee 78:4; Pot 13:24, 22:6; Kl 3:21

e6:5-8Kl 3:22-25; Ta 2:9-10; 1 Pi 2:18-20

f6:82 Ko 5:10

g6:9Dit 10:17; Jop 31:15; Kl 3:24, 4:1

h6:101 Ko 16:13

i6:11Lo 13:12; 2 Ko 6:7, 10:4; Ep 4:14; Je 4:7

j6:12Mt 16:17; Jo 14:30; 1 Pi 5:8-9

k6:14Ais 11:5, 59:17; 1 Te 5:8

l6:15Ais 40:3,9, 52:7; Nea 1:15; Lo 10:15; 1 Jo 2:14

m6:17Ais 49:2, 59:17; 1 Te 5:8; Ip 4:12

n6:18Lu 18:1; Kl 4:2-4; 1 Te 5:17

o6:19Ap 4:29; Lo 15:30, 16:25; Kl 4:3-4; 2 Te 3:1

p6:202 Ko 5:20; Pm 9

q6:21Ap 20:4; 2 Ti 4:12

r6:21-22Kl 4:7-8

Ephesians 6

Wane dupapi takange dupapinya Polome leamo doko

1 Nyakama ^a wane dupame Kamongo doko lao masetala nyakamanya endangi takangepa dolaponya pii auu pyoo sakamaiyepape. Dopa pingi mana doko tolatae. 2 “Embame ^b embanya endangi takangepa dolapo andanda semaiyoo katape.” Pii doko mana setapae dupanya andake mende. Goteme epe ditona leamo pii dake pii dakenya awapa silyamo: 3 “Dopa ^c pitinopa emba yuu dokonya kamea pyoo gii longo lao katate.” 4 Dee ^d nyakama takange dupame nyakamanya wane dupa imbu kaena lao minao imbu pisala nayalapape. Dopa napinya nyakamame wane dupa Kamongonya lao pii lamaiyoo mana minatamo dupa dopa pyoo minape lao mana lamaiyepape.

Kendemane dupapi Kamongo dupapinya Polome leamo doko

5 Nyakama ^e kendemane dupame nyakamanya isa yuu dakenya kamongo dupa paka kayamaiyoo walu lao dupanya pii sakamaiyoo kalyepape. Nyakamame mona lapo napalena Kataisanya kalai pyakamaili lao pyakamaiyoo kalyepape. 6 Endakali dupame auu kaena lao nyakama kandatamino dokopa iki kalai pyaa naenya, Kataisanya kendemane joo kalai pyoo katao nyakamanya mona dokome Goteme pipimili lao masilyamoli pyoo pyoo kalyepape. 7 Nyakamame kalai pitamino doko endakalinya kalai pyakamaili lao pyakamaiya naenya, mona epe palyetala Kamongonya kalai pyakamailyamanona lao dapa lao masoo pyakamaiyoo kalyepape: 8 kendemane ^f mendeme tamopi mee akali mendeme tamopi dupanya mendeme kalai epe pitamo dokonya baa Kataisa-kisa yole nyeta. 9 Nyakama ^g kamongo dupame nyakamanya kendemane dupa kandao mana mendai dopaka pyoo minalapape. Nyakamame dupa paka pisilyamino mana doko yakinalapape. Nyakamapi dupapi nyakama pitakanya Kamongo doko kaiti-kisa kalyamona lao masalapape. Baame endakalinya lengelyaapi kandao mokosala naenge.

Koo yanda pimaingi dokonya Polome leamo doko

10 Nambame ^h pii dake etao lelyo: nyakamame Kamongo dokopi baanya etete pupu lapae dokopimi nyakama kyoto injisina lao kalyepape. 11 Sataneme ⁱ waa katao mana miningi dupa nyakamame daa lao kyoto joo kalyanya yanda pyoo yonge pee pingi Goteme nyakama dingi dupa pitaka pee pyoo kalyepape. 12 Naimame ^j endakali-pipa yanda pyaa naenya, sipitisa koo ketae kalyamino dupapi, isingi dupapi, enomba nyoo isoo katenge dupapi, isa yuu iminjetae dakenya kamongo dupapi dupa-pipa yanda pilyamano. 13 Tenge ongonya minao Goteme nyakama yanda pyoo pee pingi dingi dupa pitaka nyoo kalyepape. Dopa petala gii koo ipatamo dokopa nyakamame kapa pao kyoto joo katapala yanda pitami. Yanda pyoo etapala dokopa isa nasoo katatami.

14 Dopana ^k nyakama kyoto joo kalyepape. Nyakamame kiningi pii doko matapu joo pyoo katao, mana tolatae doko yanda pyaanya sangalinya pee pingili pyoo pyoo kalyepape. 15 Wai ^l Pii Epe mona lyuu lasingi doko lamaiyanya depa latae kalyamino doko nyakamanya moko pee joo pyoo kalyepape. 16 Koteaka lao nyakamame masoo miningi doko konambi joo minao kalyepape. Akali koo dokome telya ita tao katenge dupame pyatamo dupa pitaka nyakamame konambi dokome kapa pao minao konjisetami. 17 Dee ^m Goteme naima pyoo nyepeamo doko nyakamame yanda pyaanya aiyombanya andu pingili pyoo andu pyoo katao, Gotenya pii Oli Sipitisanya konjua jepae doko kingimi minao kalyepape. 18 Nyakamame ⁿ koteaka lao Oli Sipitisanya pupu lapae dokome loma tata tata dupa soo tee laapape. Loma soo isetae katao koto nanyalapape. Gotenya endakali dupapi nambapi nisoo nyakamame loma salapape. 19 Nambame ^o pii laanya pito dokopa paka nakayao Goteme pitona lao yalo pyoo masiamo Wai Pii Epe doko kyoto joo lamaiyale lao baame pii epe mende namba dina lao loma salapape. 20 Nambame ^p Wai Pii Epe doko lao panao katenge tenge dokonyaka namba anjetae kalyo. Dokonya namba-kisa kalai pipenge silyamoli pyoo nambame Wai Pii Epe doko kyoto joo lao panao lamaitona Goteme namba nisina lao loma salapapeaka.

Polome etao lasa leamo pii dupa

21 Nyakamame ^{q
,} ^r namba dopa pyoo kalyeno lao masalapale lao akali Tikikasa dokome nambanya pii dupa pitaka nyakama langita. Tikikasa doko naimanya auu kaenge masoo miningi kaiminingi Kamongonya kalai akali tupi lapae mende. 22 Nyakamame naima dopa pyoo kalyaminona lao masalapale lao tenge mendai dokonya baame nyakama langyoo nyakamanya mona kyoto injisakao nambame baa epena lelyo.

23 Takange Gotepa Kamongo Jisasa Kataisapame masoo miningi naimanya kaiminingi dupa mona lyuu lasetala auu kayamaingi dokopa masoo miningi dokopa dolapo dupa-kisa sakatasina. 24 Naimanya Kamongo Jisasa Kataisa lao auu kayao malala naenge endakali dupa kandao Goteme mona epe palena.